قصة - حرمني من عيالي

[ابو اسامه]

قصتي مو بس قصه لا ،، إلا نصيحة ،،،

انا تزوجت واحد مو من قرايبي ولا جماعتي من منطقة ثانية ولا نعرفهم النصيب جابه ،،،
تزوجنا ومن بداية الزواج بيننا مشاكل بسبب اختلاف كبير بين عاداتنا وعاداتهم وطباعيهم وطبايعنا،،، وكل يوم عن يوم تزيد المشاكل وفي النهاية انفصلنا وبيننا ولد وبنت 😨😔،،،،،

حرمني من عيالي حرمان حقيقي اخذهم وغير بيته ومدارسهم وحذر كل اللي حوله انهم يتواصلون معي وأهلي اتعبوا منه يوم شافوا الوضع كذا قالوا بكيفه الله حسيبه ،💔💔💔،،
وانا ابغى اشوفهم و دايم أسأل عن بنتي وينها وبأي مدرسه واخيرا عرفت وينها ورحت للمدرسة وكان اخر الترم الأول كانت سنة أولى أبتدائي وشفتها بعد اكثر من سنه على انفصالنا والمديره طلبت مني اشوفها من بعيد لأن فيه تحذيرات من ابو البنت لهم ،،،

وهذاك اليوم بكيت حتى نشفت دموعي لأني شفتها متغيره وكبرت شوي ،،
اما الولد ماشفته،،، وبعد نهاية الترم الأول نقل ابو عيالي من الرياض ورجع لمنطقته تبعد الف كيلو عن الرياض ،،،
وكل سنه اوسط اخواني يكلمونه اني اشوف عيالي وهو رررررافض ،،اخر شي اخواني قالوا خلاص ياخيه مو لازم تشوفيهم الشكوى لله استودعيهم اللي خلقهم 😭
وانا ادري انهم معززين مكرمين وام ابوهم انسانه فاضله وعاقله وحنونه وابوهم مدلعهم حيل ،، وهذا يهونها علي شوي

وتزوجت وراحت السنين وتوفى زوجي ومعي منه ولدين وبنت وطول هالسنين وانا احاول كل سنه او سنه ونص ،،،يكلمه ابوي او خواني ويرفض رفض قطعي اني أشوفهم ،،

:
:
:
حتى في مره واحد من اخواني كان رايح هو وزوجته وعياله لنفس المنطقة اللي ساكن فيها ابو عيالي وقال دام اني هنا بحاول احل الموضوع معه وسأل عنه في شغله وعرف بيته ودق عليه قال انا قريب لبيتك جاي ومعي اختي ((اللي هي انا يكذب عليه)) يبي يحجر له وراح هو وزوجته وعياله يوم وصلوا بيته طلع عليهم وطلع السلاح وقال لأخوي ان نزلت قتلتك!!!! ،،،
:
أتصل اخوي بعدها وقال هذا مافيه عقل بغا يذبحنا فكينا منه والشكوى لله ،،،
راحت السنين وكبروا عيالي وصاروا بالجامعة الولد اكبر من البنت بسنة
وبفضل الله سخر لي برنامج ((تويتر)) ولقيت الولد حاط اسمه واسم قبيلته ما حط اسم ابوه بس عرفته من شكله ولدي وشلون ما اعرفه ،، عرفه قلبي قبل عيوني ❤️ وكتبت له،، انت فلان بن فلان الفلاني قال ايه قلت ماشاء الله ،،،الله يخليك لأمك وأبوك قال امين بس امي متوفيه هنا انصدمت انا ،،،
وقلت له اني أعرف امك فلانه الفلاني قال صحيح كيف تعرفيها؟؟ وفرحت انه متحمس انه يعرف اي شي عني ،،، وقلت له انا امك وتفاجأأأأأ😳 واضافني بالواتس وقالي انا دايم اقول امي متوفيه وانا عارف انك مو متوفيه بس لأنك رميتينا وماتبغينا حنا كمان خلاص نعتبرك ميته ،، وقلت له كل شي ،، وبدأ يكلمني ،،
والمصيبة انهم ساكنين من سنتين في الرياض بس في حي بعيد مره عنا وجاء ولدي وشفته وسوى له ابوي عشا وعزم اخواني وخواتي وكانت فرحه ماتوصف صار اطول ولدي مني 😍😭 الله لا يسامح ابوه ،، والبنت كان باقي على زواجها اقل من شهر
قال ولدي ماودنا نقول لها شي الحين ،،،
مو وقته ، وعجبني الرأى واستحسنته ،،ورفض اني احضر زواجها قال مالك صالح فيه واخاف ياأمي احد يعرفك ويوصل الخبر للبنت ،،، وتخرب ليلة عمرها قلت ابداً ما احد راح يعرفني واعطاني كرتين دعوة لي ولأختي،،،

:
:
:
ورحنا الزواج ،،😰
وكنت متحجبه مغطيه شعري مايمكن احد يعرفني ومافيه مكياج كل ما احط كحل يسيح من كثر البكا 😢من عطاني الكروت وانا ابكي 😢ولما دخلت القاعة صرت ارجف 😥
والله لا يوريكم لما زفوها 😭😭،،، حسبي الله على ابوها اللي حرمني الفرح والسعاده في حياتي موقف لا ينقال ولا ينشرح الله لا يحط اي مسلمة ولا اي انسان في مكاني
بنتي عروس زي القمر وضحكتها ماليه القاعه وماقادره احضنها ولا ابارك لها ،،😭😭😭وجدتها وزوجة ابوها واقفين معاها وانا من القاعة للمستشفى انخفض علي الظغط ماأكلت ولا شربت شي من الصباح ومع الحزن والبكاء تعبت كثير،، وولدي كل شوي يدق وما ارد لما صارت الساعة وحده ردت اختي عليه وقالت له اننا في المستشفى وجا بسرعه ويعاتبني ((انا قلتلك مايصلح تحضري الفرح)) ،،،
وبعد اربع شهور جاني ولدي وجاب اخته
معه موقف يبكي الحجر 😪😭الله يخليها لي هي واخوها والتمينا بعد سنين من البعد والحرمان ،،
:
وجدتهم مررره حنونه وزوجة أبوهم الله يجزاها عني وعن عيالي خير الجزاء ويخليلها عيالها ويفرحها فيهم ماقصرت معهم ابدا وربتهم ودلعتهم يقولوا لها ((ماما فلانه)) ومايزعلني ابداً اقل من حقها :


:
:
:
وحملت بنتي وكنت افكر كيف بزورها في بيت ابوها اذا ولدت ،، فيه نوع من الأحراج ما احب اتواجد في مكان يخص ابوها ،، كان مشغلني الموضوع،،،،
وفي يوم قالت لي بنتي ... ماما لا زم نغير الكنب ...!!
عشان يطلع شكله حلو مع التوزيعات
قلت كيف؟!!! بتجلسين عندي ؟؟!!!
قالت اكيد ماما مين بيهتم فيني و بولدي زيك 😭😭
ورغم اني ساكنه بشقه صغيره فوق بيت اخوي إلا انها فضلتها على فلة ابوها :
وابوهم بالأخير تقبل الوضع ورضى بعد كل هالسنين 😡،،،،
والحمدلله اللي جمعني بعيالي الله لا يحرمني منهم ،،،
بس مو قادره اسامح ابوهم احس بغصه وقهر على السنين اللي حرمني منهم بدون اي فايده وبالنهاية رجعوا لي ماستفاد شي 😪،،

ومن هنا اقول لكل اب لاتحرم العيال من امهم مهما كان ماراح تستفيد اي شي غير الدعاوي والتحسب عليك ،،،في النهاية هي امهم و ظلم انك تحرمها منهم وتحرمهم منها ،،،،
وعيالي دايم يقولون .. حللي ابوي بس موقادره ابغى اوقف انا وهو امام الملك العدل الفرد الصمد ودي اخذ حق كل ليلة اختبارات سهرت ابكي وادعي لعيالي وكان ودي يسمعوني وانا ادعيلهم 😢وكل أيام شهادات ادعي ربي ينجحهم واتمنى اعرف نتايجهم 😢وكل أيام وليالي الأعياد اتمنى اشوفهم بكشخة العيد 😢،،، كنت اتابع النشره الجويه عشان اشوف درجة الحراره بالشتاء ،،واخاف عليهم اذا كان برد وانا مالي حيله 😢،،،،
راحت السنين وبقى القهر والغصه
ضيع اسنين من عمري وعمرهم 😭😰،،،، :
:
: