دويدة ام الذبان





هاذي قصة كتبتها لكم بلسان جدتي
وان شاء الله تعجبكم
علما اني قد نزلتها بنادي العضويه الذهبية


يقولون في وحدة عندها ثلاث بنات وحامل وهي جالسة ومتكية تقهوى مع ابو الشباب
قالت : يابو فلان نذر علي لاجاني ولد لرمي بناتي الثلاث في الشعيب

مرت الايام و والاسابيع والشهور والمرة ولدت وجابت ولد
ومثل ماقالت سوت ( انا اقصد يومها تنذر انها بترمي بناتها في الشعيب )
وراح الابو بالبنات للبر علشان يحشون ومن هالعلوم وابعدو عن الديرة واجد ويوم تغافلهم الابو هج وخلاهم

البنات تفرقو كل وحدا راحت بطريق يوم درو ان ابوهم سوا فيهم هالسواة
البنت الاولى دخلت يم ديرة من هالدير وصارت كل ماشافت حريم يطحنون بالرحى تقوم و تطحن بدالهم عاد هم يعطونها شوي من هاللي طحنته لهم سوا كان جريش او طحين

مرت الشهور والسنين والبنت ضاق صدرها لاحنيس ولاونيس ولا احدن يرادها الصوت
والبنات اللي كبرها اللي تطحن هي وياهم معرسات وتسمع من هاالحكي الخاثر اللي بينهم وهي تحسر على حالها
المهم البنت فكرت فكرة جهنمية اللي هي
راحت وسوت قرصن على المقرصة وش كبرة ودخلت على البنات وقالت من اللي تبيعني رجلها بهالقرص وهي تقول الحكي لهم كأنه مزحه
قامت وحدتن من هالبنات اللي عارفتن بغلا رجلها لها وقالت لها وهي تميلح انا بعتك اياه بس هاتي القرص ناكله ردت عليها راعية القرص طيب رجلك من يقاله وش هالمعرس اللي مايندرى وش اسمه راحت اختنا في الله الهبلا وعلمتها بسم رجلها وقالت هو فلان الفلاني وهي تضحك
راعية القرص الذهينه عقب ماكلو البنات القرص ووسعو صدورهم استأذنت راعية القرص ووقفت عند المسجد لين خلصو الصلاة يوم طلعو الرجال قالت وين فلان الفلاني اللي هو رجل اللي كلت القرص راحو الشباب ونادوة يوم جا لها قا خير وش تبين
قالت له : انت مع اللي شاريك ولا اللي بايعك ؟؟
رد عليها وقال : اكيد اني مع اللي شاريني
راحت البنت وقالت له السالفه كلها واني شريتك من مرتك بقرصن وش كبرة
الرجال قال دام السالفة كذا قدام بس وراح يم المملك وملك عليها ومادرت حرمته الاولى الا يوم دخل بها للبيت ....
مرت الشهور والسنين وراعية القرص رزقها الله بذرية (اطفال) والاولى ميب تحمل عاد الاولى قبلها تدق على الثانيه بالحكي وتقول :

نهودها تطرطبت *** وضلوعها كالقياس >>


طبعا بتطرطب وتهدف على قولة جدتي مع هالحمال والرضاعة

المهم ان راعية القرص ملت من هالحكي اللي قبلها تقولة لها وقالت لرجلها السالفة كلها
رجلها ماقصر معها وقال لها لاقالت لك هالحكي ردي عليها بهالبيتين :
الحاملات الذهب *** والحايلات النحاس
قولو لمن لاحمل *** يطوي من الحب ياس

من بعد ماقالت المرة الثانية للأولى هالبيتين وهي متسنعتن معها ولا عاد تذب عليها بالحكي اللي ماله سنع
_________________
الحين نجي للأخت الثانية طبعا بعد ماتفرقو البنات وراحت كل وحدا تدور نصيبها الاولى كان نصيبها تروح بقرية وتطحن عن الحريم واعرست على رجل شرته من حرمته بقرصن كبير وباقي سالفتها تعرفونها عاد
اما الثانيه سبحان الله كان نصيبها تروح لمزرعة وش كبرها وكانت تشتغل عند اهل المزرعة مثل مانقول الحين خادمة تطبخ وتروي وتخرف وتحش ومن هالامور
الزبده ان البنت كانت جميلة جدا هاك البياض والحال والعيون الوساع والشعر اللي ياصل ل..... >> لاتشرهون وصف عجيز وش اسوي بعد
والمزرعة كانت مليانه شباب والبنت تخاف على عمرها منهم فكانت تحط سنو على وجهها واطراف يديها عشان ماتفتنهم ويتعرضون لها الشباب
واذا سألوها عن اسمها قالت انا يقالي دويدة ام الذبان على اساس تكرهم فيها
مرت الايام والبنت قرمه وسنعه وراعية بيت وتوجب وصارت كنها من بناتهم وبينما هي تروش في البركة قزها واحد من عيالهم وشافها وشاف هاك الشعر والبياض والزين وتعلق قلبه هالضعيف فيها
وغث اهلة مابي اعرس الا على دويدة ام الذبان وكلهم يقولون وع وش فيك انت ماتشوف اهبل وراك معمين عنها ومن هالحكي
والولد جته صخونة ولاعاد صار ياكل ولايشرب وقبله يطوري بدويده ام الذبان
يوم شافو اهلة حالته كذا قالو مالنا الانزوجه اللي يبيها لايجي ولدنا شي
وفعلا مامر ثلاثت ايام الا وهو معرسن على دويده ام الذبان
واخوانه اللي ماتعشى من عشى عرسة واللي يتطنز فية وفي اختيارة وووو
ويوم دخل عليها وش يشوف ملاك في صورة بشر والام والاخوات ماصدقو يوم شافوها وين ذيك الشينه الشهبة وش كنتي تسوين بحالك ووراه ؟؟
البنت اللي هي دويدة قالت لهم قصتها انها تخاف احدن من هالشباب يعترضها فمالها الا هالطريقة عشان يبعدون عني
مر اسبوع والرجال كل ماله يتضايق من حكي اخونه وتطنزهم علية وعلى ذوقة
فالرجال ناد مرته اللي هي دويده وقال لها شوفي ابيك تجلسين بالمجلس وتفكين شعرك وابي انادي اخواني وندخل كاني مادريت انك هنا هماه
وفعلا سوا هالحركة ودخلو ويوم شافوها والا تطير عيونهم من هالزينه
عاد الرجال قام يتميلح كانه مادرى
ويقول هو وراك قاعدتن فيذا يادويدة ؟؟ >> يعني تراها مرتي
من عقبها ماجابو اخوانه طاريها بشين شينن ابد من بعد ماشافوها
مرت السنين
وفي يوم كانو العيال طالعين يصلون صلاة الجمعه والام والبنات رايحين يسيرون ومافي بالمزرعه الا دويدة قاعدتن تصلح الغدا لهم وهي تزيين الغدا الا وتسمع صوت خترشة واحدن يمشي ويصدر اصواتن غريبه يوم لفت وطاحت عينها على هاللي قدامها ارتاعت وش تشوف وحدا شوشتها طايرة ووصخه وريحتها لاتطاق والدم حول فمها يابس دققت دويدة فيها الا اثرها اختها الثالثة واثرها استسعرت وصارت من هالوحوش
خذتها دويده ونظفتها ولبستها ومشطت شوشتها وعطرتها ووكلتها لياها تاكل هالاوادم اللي بيجون بعد شوي بما انها استسعرت
ويوم جو الا وتقول لهم سالفه اختها وقامو هم عاد ورحبو فيها وكل ماسألو الحرمه سوال طيرت عيونها فيهم ولاترد
واختها الثانية ترقع لها وتقول اخيتي تستحي لو من ضلها
المهم دويدة ماقصرت مع اختها كل يوم تنظفها وتزينها وتوكلها لياها تعتدي على احد وتاكلة
المهم واحد من اخوان رجل دويدة اللي شافو دويده على طبيعتها عقب سالفة المجلس الا ملزم ياخذ اخت دويدة حاولت دويده منا ومنا انه مايعرس عليها ولا فاد
وفعلا تم العرس
ودويده على اعصابها اختها وعارفتن انها مستسعرة وتاكل الاوادم مثل الوحوش
وكل شوي دويده عقب مادخل الرجال على اختها تطل عليهم وتشوف وش الاوضاع وكل شي تمام وما كلت هالرجل
دويده غفت واستسلمت للنوم فزت وقامت وهي قلبها موجعها يوم راحت وطلت الا اختها شاقة بطن الرجال وتاكل في مصرانه وكلاة ووو
دويدة خافت من وضع اختها ولو درو اهل رجلها بيطردونها عقب هالسالفة
راحت تركض دويدة وتجمع تبن يابس وتملا الغرفة اللي فيه اختها وتاخذ عسيب نخله يابسة وتشب فيه وترميه على التبن اليابس وتطلع وتصك الباب على اختها يوم درت وتأكدت ان اختها ماتت واحترق كل مافي الغرفة قامت دويدة تصوت ياناس يالربع المعاريس في غرفتهم ضون شابه الحقو عليهم تكفون
يوم جو الجماعة وش يلحقون علية كل شي رماد برماد ولا بين للمعاريس اثر
مرت السنين ونسو السالفة ...
وفي يوم من الايام ورجل دويدة يسولف عليها بموقف مر علية بسفرته مضيقن صدرة
اللي هي
عجوزن كبيره ماغير تسحب من هالبير وتروي للناس ووراها ولد ماغير يندح فيها ويضربها من ظهرها ويقول
صب الما ياعربيد *** حيث حالك مايبيد
والعجوز ترد وتقول :
حيسفا ياسويد على من رمى بناته في االشعيب
الا يوم خلص رجل دويده من سالفته الا وعييناتها يادويده تهامل دمع
سالها رجلها وقالها وراك تبكين ؟؟
قالت شفت هالحرمة اللي تحكي عنهاهاذي امي وقالت لرجلها السالفه كله من طقطق لسلام عليكم
المهم طلبت رجلها يوديها للمكان اللي شاف فيه اميمتها وفعلا وداها ويوم وصل وش تشوف منظر يعور القلب واميمتها ماغير تردد وتقول ياحيسفا ياسويد على من رمى بناته في الشعيب

خذت اميمتها عندها بالمزرعه ونظفتها وزينتها وعزتها ورزتها
وامها ماغير كل كلمةوالثاني تشكر ببنتها على فعايلها معها مع انها ماتستاهل اللي هي تسويه لها
وهي راميتهم بالبر

وبكذا تكون قصتنا خلصت وان شاءالله عجبتكم
سمو