مرحباً بك زائرنا الكريم .. لك حرية الإستفادة والنشر
بســـــــــــــم الله الرحمن الرحيم*سودانين مغرزين في الصمان بالذات بعد الأمطار*
مســــــــــــــــــــاكم الله بالخير جميعا ً.
غدا ً أول أيام العيـــــــــــــــــــــــــــد، أعاده الله علينا وعليكم باليمن وبالبركات.
" هـــــــــــــــــــــــــــــذه قصة ســــــــــوداني" وعليكم الحكم طبعا ً لددية مشكلتان ضعف السمع وبيني وبينكم التخريف لا تعلمون أحد
والقصة كما يلي: بلسان " أبو سودن
يقول:
" كنت قبل أربع سنين طالعن للصمان ( الصمان صحراء في كوكب الأرض قريب من كوكب فيقا ) بلحالي مسيرن لي على ناسن شمال شرق قرية اللهابة
يقول: ومعي جمس فورت حمر طويلن بلحيل وغمارتين موديل 89 ومصمم خصيصاً للبر وتانكيين بنزين وصدامه عريض فيه ونش و قارمن ومصدات مضادة للصواريخ ومظلل بالكامل ومركب فيه جهاز كينوود نتصل فيه على بعضنا أنا وربعي من طعس لطعس وصندوق الجمس مليان حطب وجحلة موية (برميل ماء بلاستيك أسود) وشنطة عزبة (شنطة فيها مواعين مب إسعافات أولية) ودبّة غاز وحركااااات
المهم يقول :
كلموني عيال عمي في روضة نورة عند محافظة تمير يقولون إن أهلك إتصلوا قبل الظهر من الرياض ويبونك ترجع الديرة أبوك تعبان بلحيل ولقطوه مستشفى العسكري
يقول أنا أختبصت ومن العجله صليت مع ربعي العصر والله مدري بعد أنا توضيت ولا لا وقمت أعمّج وأتوطى العثامير << مدري وش معناها أنا زات نفسي بس مشي حالك
يقول متوجهن صوب أم الجماجم << قرية برية على طريق حفر الباطن - الكويت
يقول طريقي كله بر ما مريت على زفلت أبد ... يقول يومنّها غيمت وبدت تضرب (يعني أمطرت بغزارة )
.. يقول مطرررر شديد وبروق تخطف العين خطف
المهم يقول : ماتحتي إلا أرض ومافوقي إلا سما والمطر طق طق طق فوق راسي .. وفجأة كأني لمحت زول سيارة من بعيد .. يقول وأنا أقوم أتهجّس وأقول لروحي( ياولد هي سيارة !!
هي سيارة !! ؟
سيارة مهيب سيارة سيارة مهيب سيارة خيمة مهيب خيمة
يقول قربت أكثر وأثاريها من بعيد كنّها سيارتن بيضا صغيرة بلحيل .. يقول قمت أحوم وابترم من بعيد وأضرب بوري لاتصير سيارة عوايل ولاّش وأقوم أفتح القزازة شوي وهي تضرب وأصوت ياولد ياولد ياهووووووووووووه
يوووووم إني قربت كثير والا والله إنها سيارتن مغرزتن لها بوجه عقم (يعني حاجز رملي معترض)
يقول تبينت أكثر والاها سيارة تويوتا كراون يابانية موديل 84 أو 85 قديمتن بلحيل ونورها ضعييييف مرّة والكنداسة مندفنه والشكمان ينفخ تراب وبسباس وبوسط السيارة فيه مخلوقات ملفوفة بقماش أبيض بابيض راس الواحد منهم تقل سنام بعير ولا أشوف لهم وجيه يقول أنا سمّـيت وتعوذت من بليس وقريت مدري هي آية مدري هو حديث يقول من الخوف ارتبكت وغصيت وقمت أقرى مدري وش انا قريت
يقول اللي بالسيارة ماحسوا فيني لأنها تمطر بقوة ويوم إني قربت ضربت بوري قوي مرتين يوم تناطقوا علي من كل دريشة أربع زولات كل واحد عمامته تقل طاقة ثوب رجالي من حقات الجديعي قبل التفصيل ،، شكلهم ماصدقوا جاهم الفرج
سلام عليكم السلام وش أنتم من لحى !!! يقول ولا واحد جاوب << الظاهر مافهموا السؤال
يقول مشيتها لهم حسيت إني جرحت شعورهم .. واحدن طويل بلحيل وبتره (يعني دب) والثاني أطول منه بس عصل شوي والثالث مربوع ولابس نظارات ومتلثم وشكله تقل صايح لين قال بس مدري شلون متصفطين بهالسيارة الكسرة ومعهم واحدن مصري إسمه أستاد حمدي قرقه بلحيل بلحيل (ثرثار يعني) .. يقول عرفت منهم إنهم مدرسين كانوا معزومين بروضة التنهاة على الغدا عند زملاء لهم سعوديين يوم قرروا يرجعون ضيعوا الطريق وراحوا شمال بدال جنوب وداسوا لين غرزوا قبل تصير الأرض رطاريط ( رطاريط يعني رطبة)
يقول أنا بخفف عنهم الضيقه وقمت أسولف معهم قلت لهم : وش الله بلاكم بهالعثمور ياناس ؟؟ يقول كل واحدن ناظر الثاني وبلع لسانه ولا يهمكم إستريحوا واركبوا سيارتكم لا تنزلون علشان المطر وأنا بصير قدامكم من ورا العقم وأشنكركم بليور (ليور يعني سلك حديدي غليظ وطويل)
يقول شبكت الخطاف بصدام كسرتهم البيضاء من قدام وشبكته بصدام موتري من ورا وقلت للسواق لا تعشق السيارة بنمرة وخلها على الفاضي
لأن قير سيارتهم كلتشه الظاهر محترق ..
يقول سحبت سيارتهم شوي شوي لين طمرت بهم العقم وبديت أسحب بسرعة أكثر وظليت أسحب لأن المكان تغاريز وشين مو مفروض أوقف فيه أبد ..
يقول سحبتهم وتوجهت جنوب نصي علشان أقرب خط إزفلت أتوقع إنه بيكون على بعد كيلوين أو أربع بالكثير ودست بنزين ..
يقول سيارتهم صغيرة بلحيل ماشوفهم من ورا والقزازة الخلفية عندي مظللة ..ومطر.. وليل ومسكر درايش سيارتي ودايس..
يقول دقوا علي ربعن لي على الكينوود عازمينن على العشاء بروضتن بالصمان وقعدت أسولف معهم وأنكت وأتخيل نفسي جمس بوند دفرنسين خخخخ.. وإنسجمت وقعدت أقولهم إن أبوي تعبان شوي ولازم أرجع الرياض وملحوقين إن شاء الله
يقول السوالف والذب والتعليق والعيارة خذتنا وقمت أطامر بين هالعقوم والنفد مطامرن شين والأرض مهيب هاك اللي ..ولازم إني أسرع شوي لا أطيح لي بطين أتورط
ومن مطب لمطب ومن فوق شجرة لفوق شجرة نسيت الدنيا واهله
يقول يوم إني تواسيت بالرمل وصفت الارض شوي قمت وشغلت المسجل على مضارب البادية في إذاعة الكويت وأنا خرمااااان قصيد بشكل مهوب طبيعي وأقوم مع الربابة أتجدع كنّي غسالة مليانتن ثياب وشابكينها بخط 220 وأتمايل وأجر الصوت تقل بي زار وطرباااااااااااااان وماغير أصبخ بهالدركسون من حر ما أوجس..
ومن جرف لدحديرى ومن طعس لطعس ومن عقم لعقم كاااانس ومسرع بهالليل.. وبهالبران لحالي تقل جني بسم الله علي...
يقول: شديت على الموتر شوي وصرت أمشي يمكن 90 .. وفجأة .. بسم الله يزوّل لي إني لمحت نور خطم من تحت سيارتي بس تعوذت من بليس وصديت وركزت على القصيد ...
وشوي كأني لمحت زول شي أبيض خطف عيني خطف !!
ومن داخل السيارة خبركم بخار تارس السيارة من جوا وبرا السيارة ظلام أسود
يقول وأولع لي هاك الزقيره مالبورو سايز تقل عجينة من الرطوبة و طولت الرادو علشان أطرد الهواجس وقمت أتسدح مع كل قصيدة طرباااااااااااااان أويلاااااااااااااااوه
يقول طول الطريق وانا أسمع قرقعتن وراي تقل سيارتي مدرعة بس ما اهتميت دايس ومقزز وفي بالي متى بس أوصل الرياض قبل ينامون اهلي لأني مامعي مفتاح للبيت .
يقول كل شوي أسمع صوت تقل بوري من وراي !! بس أتعوذ من بليس وأقول بقلبي وش يجيب البوري بهالبر وبهالليل بسم الله علي .. خفت ودست أكثر وقمت أطامر مطامر بين هالنفد وهالشجر.. مرتن أطمر شجرة ومرتن أطمر حصاة مرتن أطب في طين ومرتن أحك لي حصى... ومسرع وخايف يبنشر علي كفر وانا بهالليل أعوذ بالله وبدت الهواجس والتخيلات إن وراي جن يبون يسدحونن !!وأدوس لين وصلت يمكن سرعة 110وماتشوف إلا هالحطب يتطايرن هنا وهناك
يقول أنا.. شوي بسم الله إلا كأنها طاسة سيارة صغيرة دنّت من قدامي أسرع مني إنطلقت من وراي بسرعة رهيبة مدري من وين جت وابترمت أبترمت أبترمت لين دخلت بشجرة .. يقول أنا قلت بس ..
عز الله جو الجن... عز الله ماوصلت الرياض ياولد .. وقمت أعضعض براطمي وقمت أسبح عرق وماخليت سورة من جزء عم إلا قريتها والله إني دخلت عبس على النازعات
يقول وأنا أمغط ....
وأمغط ..
وأمغط ..
وكل شوي يا أنط لي عقم يا العقم هو اللي ينطّن ... دااااايس
لين لمحت لي الخط من بعيد ( الأسفلت ) يقول قلت : بسسسس هذا أكيد خط رماح ...
بس ويييييييييين جابنا لرمااااااااح ياولد !!!
يقول إكتشفت إني كنت مبطي أمشي ياعمري يا أنا ولا خطم لي ولا إسفلت ....ويمكن إني طامرن لي خطوط بس ما انتبهت مدري والله ..
يقول قمزت الخط وركبته وقمت أحوص بالخط يمين يسار يمين يسار لين تواسيت وكل ماناطحتني سيارة كبّست لي وضربت لي بوري قوي وطوييييييييييل وانا مانب فاهم وش السالفة لحد الحين ..
يقول أنا قلت وش فيهم هالعالم مهمب صاحين !!!
يقول يوم إني قربت لمحطة بنزين بان نورها من بعييييد يقول سمعت صوت جلعدة وحكحكة حديد كأني أسحب وراي تنك بس خبركم الدنيا ظلام وخوف ومازلت أحس إن الجن بسم الله يجرونن من ورا مايبونن أوصل المحطة !!!
قلت بنفسي مانيب والله واقفن بهالمطر أبواصل لين أوصل المحطة على الأقل أطمن لخاطري .... والساعة يقول وصلت تقريباً عشر يعني صار لي تقريباً ثلاث ساعات ونص
يقول : يوم إني وصلت المحطة مير أوقف .. وأفك اللطمة وأسدح الشميّغ على الطبلون .. وألبق عند المضخة أبيه يعبي بنزين .
وافتح الباب بشويش ونور المحطة كاشحن بوجهي تقل صايدين لهم جربوع
يوم إني رحت أتفقد سيارتي من ورا إلا والله هاك السيارة الكسرة البيضا ناشبتن بموتري من ورا وقزازة السيارة الأمامية متهشمه بس ماطاح القزاز وطياس السيارة الأمامية والخلفية مافيه ..وكفرين ورا منسلخات ويمشن على الجنوط .. ونورهم طافي .. وناسن عيونهم حمر وشعورهم منتفشة تقل شجر أثل مايحكون مع بعض من الزعل متورمتن عيونهم بوسط البودي وناشفة أرياقهم من الصراخ وقافلتن معهم
والطويل متلطم ويقول : ياخي الله لايدّيك عافية لاكين .. لايلاه إلا الله بااااالغتا يازول
مالك اتجنيتا ولا شنو !!؟ ماشايف!؟ ماسامع !؟ ليه لاكن!!؟
يقول مير أتذكرهم هذولا هم اللي العصر مغرزين بس يقول مدري ليش أنا مافكيت الليور يوم طلعتهم !؟
انتهت القصة بتصرف وهي للأمانة ملطوشة لطشاً محترماً بقوه
كــــــــــــــــــــــــل عام وأنتم بكل خير
هههههههههههه
ههههههههههه
هي صارت ... وعساه مايتولانا ونروح فيها :mwalat15: ... وبالأخير نصير مجانين ... والله انه مطفوق :mwalat9:
اعوذبالله قطعت مصاريني من الضحك وقصة تهبل
تسلم يابو نواف : هالايام ماشاءالله مكثر النكت .. او هذه عيدية المنتدى
الله يبارك فيك ويخليك لعين ترجيك
تسلم والله ياخوي على النكت الظريفة :mwalat19:
دمت بصحة وعافية
شكرا على مرورك لموضوعي
